litenlibassa.com

Ntuk ndamb makôô le Job nu a ntip sane ni hikip hi Belgium a ntimbhe Eric Roland Kongou

Bôt bobasô ba hoñlak le mam ma mal we. Ndi u mpuhe bés ni majôp moñ i hikip hi Belgium.

Me nok bé inyu kii bôt ba nhoñol le me mal. Me ntip sane ni Lierse Sport Kring. Mam momasô ma bi kidna i dilo 31 di Kondoñ. Hala kii me bi nyodi i hikip hiem hi Turki, me bé le me sane ni tonje. Lierse Sport Kring a yé man hikip i mbai kii Lens, tole Nante i Pulasi.Hikip hi ngi yiine i nlôñ u nyônôs iba u pénsan ipôla dikip di loñ, ndi hi nsômbôl bet i nlôñ bisu. Jon nkena hio le Sangô Maget, mam Egiptô a nsébél batuk ba ba gwé nom’bôlô le ba loo i ti ngui. I len ini, di yé hikip hi bisu i nlôñ u nyônôs iba i pémsan ndamb makôô i Belgium.

We ni Rudolph Doualla Mbella ni bi nsane nlélém ilo.

Mbale i. Me yé masé i ba ni Doualla Mbella i Belgium. Me nsane ndik inyu sôñ ina. Hala a nke me inyule  a nti ngéda i tehe lela hikip hi nke, ilo di mba di mal lini liben li ntuk. Kii me yé i Belgium, hala a nla hôla me i kônde téba i hikip hi loñ yés Kamerun. Me bi sôga séblana i nwii u ntagbe. Me ntehe le bakena ikip ba malak bé oñ hio, ndi ki pémsan biloñ bi Nkoñ Isi i yé len sôñ aa.

Mbale i le Paul Le Guen a ngi léñlak dikip di Erôpa inyu léba bon ba loñ…

Maliga ma. hikip hiés hi nyonok bé; ndi kile mintuk mi nlama mbôdôl len sôñ aa. Hiki mut a ntehe le nkena hikip a nsômbôl ti hio mbimba, jon a nyiñil batuk ba ba gwé nom’bôlô. Me nyi bé bi mbe biyimbne a ngwélél inyu tep bôt béé. To nje mut a nla bana ntoñ. Ibale me gwé biyimbne bi a nyéñ, ki me ga la téba. I pes yem, me nyi le me gwé bisélél, ilo Mpuye (sôñ itan) u ba u ntagbe, me ga bana ki ngui iloo len ini. Me yé banga njo nsañ nkeñi, me ñyi ki i nsombla. Me mbem ndik nsébla

Di ntehe le u ngi gw é makénd. Ndi i nwii nwoñ (Nwii 32), di nla kal le bimañ bi ngwel we....

(a nol). Me ñyi bé kii ni nsébél bimañ. Hiki mut a nyi le me bi gwééné i Pulasi ni le mbale i le me gwé 32 ma nwii. Ngim bôt ipe i nhoñol le bitembee bi. Ndi bé bomede ni nla bé tañ le bisega gwem kiki  bo Didier Drogba bi ngii tuguk loñge. Hoñol yem i yé le nseñ u yé ndik le bol i tuga loñge.

Ni hôya bañ le me m’a tuk pémsan i Nkoñ Isi iba (1998 ni 2002). Hala a ta bé nso jam. Me nla tuk kii mbiñ ikip tole kii mut mahénha. Hkip hi ngi ôñga, nkena a ngi yéñég batuk, me nlehel bé ñem, me hoñol le yak me me nla ke i Si Afrika.

Lipem li Mutation ; Nkobol ni hop u basaa : Jeanine Nyobe